Jedanaesti Festival savremenog klavira održan je 02. i 03. februara u Parizu. Organizator festivala Konzervatorijum “Frederik Šopen” je posvetio ovo izdanje savremenim autorima Francuske i Njemačke, povodom obilježavanja 100 godišnjice završetka Prvog svjetskog rata i neprijateljstva dvije zemlje i isto toliko godina od smrti Kloda Debisija, francuskog kompozitora, impresioniste Kloda Debisija. Otuda moto festivala “Debisi, Francuska, Njemačka, kompozitori današnjice“.
Kao partner u ovom projektu, na Vikendu savremenog klavira, našu školu su predstavljale Iva Ivanović (klasa Dragice Perović) i Maša Vujadinović, (klasa Jelene Krivokapić), učenice trećeg razreda srednje muzičke škole. Iva Ivanović se predstavila kompozicijama francuskih autora Frasisa Pulanka (Noveleta br. 2) i savremenog kompozitora Olivijea Penara (Barkarola iz zbirke Pieces eparces), a Maša Vujadinović kompozicijom Geburtstag watzer savremenog njemačkog kompozitora Jorga Vidmana.
Festival je otvoren koncertom (cine-concert) koji je pratila projekcija filma „Pasji život “Čarlija Čaplina iz 1918 godine. Ovaj koncert je realizovan u partnerstvu sa Američkim konzervatorijumom Koening u Parizu, a povodom 100 godina od prve projekcije filma.
U nastavku festivala, priređen je i koncert posvećen savremenom francuskom kompozitoru Filipu Hersanu (Philippe Hersant) kome je prisustvovao autor. U drugom dijelu koncerta izvedena su djela savremenog francuskog kompozitora Olivijea Penara među kojima i svjetska premijera njegove Sonate za klavir.
Oganizovan je i koncert posvećen Alenu Luvijeu, nekadašnjem direktoru Nacionalnog konzervatorijuma (CNSMDP) i dobitniku Rimske nagrade za komponovnje. Koncertu je prisustvovao autor.
Na koncertu pod nazivom Francuska-Njemačka1 izvedena su djela Volfganga Rima, Filipa Manurija, Fridriha Zema, Bruna Mantovanija, Jorga Vidmana, Olivijea Mesijana, Renoa Granmanža.
Naredni koncert je bio posvećen Klodu Debisiju, povodom 100 godina od njegove smrti. Pored djela ovog kompozitora u originalnoj instrumentaciji i u transkripciji za druge instrumente, izvedena su djela nastala njemu u čast, od kojih je jedno svjetska premijera.
Festival je zatvoren koncertom pod nazivom Francuska-Njemačka 2 na kome su izvedena djela francuskih i njemačkih kompozitora: Georga Fridriha Hasa, Kristobala Halftera, Fridriha Zema, Helmuta Lahemana, Žaka Kasteredea, Tristana Muraia, Andrea Žolivea, Henrija Ditijea, Fransisa Pulanka, Hermana Renjea, Filipa Šelera, Keti Žan Tiseir.
Festival Vikend savremenog klavira okuplja učenike i studente opštinskih konzervatorijuma grada Pariza, kojima se pridružuju konzervatorijumi Dunkerque i Clamart kao i Regionalni konzervatorijum (CRR) i Nacionalni konzervatorijum (CNSMDP), institucije koje finansira država. Pored učenika i studenata, na festivalu nastupaju i profesori i profesionalni pijanisti.